सल्यानको कालीमाटी र दार्मामा भएका घटनामा परी २ जनाको मृत्यू

सल्यान १९, साउन ।
सल्यानका छुट्टाछुट्टै घटनामा परेर २ जनाको मृत्यू भएको छ । जिल्लाको कालीमाटी गाउपालिका र दार्मा गाउपालिकामा भएका घटनामा परेर २ जनामो मृत्यू भएको जिल्ला प्रहरी कार्यालय सल्यानले जनाएको छ । जसमा गत साउन १६ गते माछा मार्ने भनेर शारदा नदिमा गएका एक बालकको शव सोमवार भेटिएको छ ।
कालीमाटी गाउपालिका वडा नम्बर ४ घुरचौर घर भएका ९ बर्षिय निर्मल भण्डारीको सोही गाउपालिका वडा नम्बर ५ पैठक स्थित शारदा नदि किनारमा शव फेला परेको सल्यान प्रहरी प्रमुख, डिएसपि ढकेन्द्र खतिवडाले जानकारी दिनुभयो । प्रहरी र स्थानियले खोजी गर्दा उनको शव भेटिएको उहाँले जानकारी दिनुभयो ।

यस्तै दार्मा गाउपालिका वडा नम्बर ४ पुकातका ५५ बर्षिय यज्ञ बहादुर बिकको भिरबाट लडेर मृत्यू भएको हो । आइतवार साँझ घर देखी ५ सय मिटर टाढा भिरबाट लडेर उनको घटनास्थलमा नै मृत्यू भएको जिल्ला प्रहरी कार्यालय सल्यानले जनाएको छ ।