त्रिबेणी गाउँपालिकाद्धारा १२९ जना किसानलाई निशुल्क रुपमा घाँसको बेर्ना वितरण

सल्यान ६, असार ।
सल्यानको त्रिबेणी गाउँपालिकाले किसानहरुलाई निशुल्क रुपमा घाँसको बेर्ना वितरण गरेको छ । घाँसमा आधारित पशुपालन गरी उत्पादन लागत कम गर्ने उद्देश्यले गाउँपालिका भित्र रहेका किसानहरुलाई घाँसको बेर्ना वितरण गरिएको हो । गाउँपालिकाको सबै वडाका गरेर १ सय २९ जना कृषकहरुलाई घाँस वितरण गरिएको गाउँपालिकाको पशु सेवा शाखा प्रमुख बसन्त रावतले जानकारी दिनुभयो ।

जसमा १२ हजार सेट्स सुपर नेपियर, १५ हजार सेट्स मुलाटो, ५ हजार सेट्स सेटेरिया र ३५ सय किम्बुका बेर्ना निशुल्क बितरण गरिएको उहाँको भनाई छ । यस बर्ष देखी आफ्नै पालिका भित्रका श्रोत केन्द्रहरुले उत्पादन गरेको घाँस बितरण गरिएको गाउँपालिकाले जनाएको छ ।