त्रिबेणीमा कृषकलाई घाँसको बीउ वितरण
सल्यान १६, फागुन ।
सल्यानको त्रिबेणी गाउँपालिकाले कृषकहरुलाई निशुल्क रुपमा घाँसको बीउ वितरण गरेको छ । गाउँपालिका भित्र रहेका व्यवसायिक पशुपालन गर्ने कृषकहरुलाई निशुल्क रुपमा टियोसेन्टी घाँसको बीउ वितरण गरिएको हो । आइतवार गाउँपालिका भित्र रहेका ४० जना कृषकहरुलाई टियोसेन्टी घाँसको बीउ वितरण गरिएको पशु सेवा शाखा प्रमुख बसन्त रावतले जानकारी दिनुभयो ।
घाँसमा आधारित पशुपालन गरि उत्पादन लागत कम गर्ने उद्देश्यले घाँसको बीउ वितरण गरिएको गाउँपालिकाले जनाएको छ । बीउ वितरण गर्दै गाउँपालिका अध्यक्ष मान बहादुर डाँगीले कृषकहरुलाई व्यवसायिक पशुपालनमा आकृर्षित गर्ने र लागत कम गरि उत्पादनमा बृद्धि गर्ने लक्ष्यका साथ घाँसको बीउ वितरण गरिएको बताउनुभयो ।
सो अवशरमा गाउँपालिका उपाध्यक्ष करुणा खड्का, वडा नम्बर ४ का वडाअध्यक्ष छविराज शर्मा लगाएतको सहभागिता रहेको थियो । गाउँपालिकाको पशु सेवा शाखा मार्फत चालु आर्थिक बर्षमा विनियोजन गरिएको वजेट मार्फत घाँसको बीउ खरिद गरेर वितरण गरिएको जनाइएको छ ।
