महेन्द्र रत्न माध्यमिक बिद्यालय पिपलनेटामा नवनिर्मित ४ कोठे भवनको उद्घाटन

सल्यान, २५ चैत ।
सल्यानको शारदा नगरपालिका वडा नम्बर ४ स्थित महेन्द्र रत्न माध्यमिक बिद्यालयमा निर्मित ४ कोठे विद्यालय भवनको उद्घाटन गरिएको छ । आइतवार विद्यालयले आयोजना गरेको अभिभावक भेला तथा यस शैक्षिक सत्रको नतिजा प्रकाशन कार्यक्रमको अवसरमा शारदा नगरपालिकाका प्रमुख प्रकाश भण्डारीले नव निर्मित भवनको उद्घाटन गर्नुभएको हो ।

सो अवसरमा बोल्दै नगरप्रमुख भण्डारीले नगर सरकारले सामुदायिक विद्यालयको गुणस्तर सुधारका लागि विभिन्न क्षेत्रमा काम गरिरहेको बताउनुभयो । उहाँले सामुदायिक विद्यालयलाई विश्वास गरि आफ्ना बालबालिकालाई भर्ना गराई शैक्षिक क्रियाकलापमा सहभागी बनाउन अभिभावकहरुलाई आग्रह गर्नुभयो ।

शिक्षक अभिभावक संघका अध्यक्ष कालि बहादुर रेउलेको अध्यक्षतामा भएको कार्यक्रममा शारदा नगरपालिका वडा नम्बर ४ का वडाअध्यक्ष किशोर कुमार हमाल, वडा नम्बर ५ का वडा अध्यक्ष प्रदिप शाही, बिद्यालय व्यवस्थापन समितीका अध्यक्ष हरिराम शाही लगाएतको सहभागिता रहेको थियो । अव तत्कालै बिद्यार्थी भर्ना अभियान सञ्चालन गरिने बिद्यालयका प्रधानाध्यापक प्रकाश हमालले जानकारी दिनुभयो ।

विद्यालयका शिक्षक प्रभा आकुराको स्वागत मन्तव्यबाट सुरु भएको कार्यक्रममको सहजीकरण शिक्षक ललीत पुनले गर्नुभएको थियो ।